[albanur]

“Shkolla e maleve” e Halil Budakovës

“Shkolla e maleve”, filmi i ri i regjisorit Halil Budakova, është dhënë premierë të dielën në Teatrin Kombëtar të Kosovës dhe do të vazhdojë të shfaqet në Kinemanë ABC. “Shkolla e maleve” është një film në të cilin ngjarja zhvillohet në vitin 1998-2000 në Kosovë, dhe me ngjarje që bazohen në të vërteta gjatë luftës së fundit në vend.

Përpjekja për të mbijetuar shkollimin e fëmijëve në male, si dhe pasqyrimi i situatave të vështira, dhe në të njëjtën kohë të zhvillimeve të luftës, ka qenë synimi sipas regjisorit Budakova. “Pikërisht në këtë film kemi trajtuar këtë temë e cila u është kushtuar fëmijëvë të Kosovës, se si është vijuar mësimi në kushte të jashtëzakonshme, gjithashtu popullates së pambrojtur dhe luftës ku ushtria jonë, me ato forca që i pati dha maksimumin për ta mbrojtur vendin tonë nga agresori serb, njëkohësisht duke ju falënderuar edhe shteteve mike që e ndihmuan Kosovën në çdo aspekt.

”E gjithë kjo ngjarje tregohet përmes personazheve kryesorë si Mësuesi (Burimi) i cili bën maksimumin për të mos e ndalur mësimin e nxënësëve të tij dhe qëndron deri në fund. Nga djali Krenari si një shembull i fëmijëve që është nxënësi më i mirë në shkollë i lënduar gjatë luftës, por asnjëherë nuk e humb ambicien për mësim dhe dije, gjithashtu nëna e tij Flora si një nënë me karakter të fortë, e cila asnjëherë nuk dorëzohet duke i ndihmuar djalit të saj Krenarit, dhe i del në ballë çdo sfide për ta shëruar djalin e saj.

Regjia: Halil Budakova, Skenari: Visar Fejzullahu, Producent: Hajrullah Lushtaku, Alban Budakova dhe Bashkim Shala. Rolet: Avni Lushtaku, Shaban Jashari, Merita Budakova, Enver Petrovci, Bashkim Shala, Çun Lajçi, Sheremet Jonuzi, Adem Zhitopotoku, Avni Hoti, Halil Budakova, Veton Osmani, Arian Gashi, Veton Krasniqi, Edona Berisha, Burim Koprani, Albulena Gashi, Mergim Oruqi, Xhavit Bujupi, Bardh Rexhepaj, Kenan Gurgurovci, Arian Lekaj, Alban Budakova, Muhamet Gashi.